طاهر شاران د لندن له يو سي ايل له پوهنتونه د د ليزر وړانگو په وړاندې د اتمي جوړښت په باب د کړې څيړنې له بريالۍ دفاع وروسته د فوستر کرې په نامۀ د پام وړ جايزه وگټله .
د جايزې د ورکړې پر وخت ويل شوي چې د طاهر شاران څيړنې د فزيکي غبرگون د نړيوالې څيړنيزې ادارې له خوا ستايل شوي او په دې دليل ورته دا وياړ ور په برخه کوي .
د يو سي ايل پوهنتون وايي د ډاکټر طاهر شاران څيړنه چې د دغه پوهنتون د اتمي فزيک د استاد کالا فريا تر نظر لاندې شوې وه په دې وروستيو کې د جرمني د فزيک د مطالعاتو د يوې موسسې له خوا وڅيړل شوه او د خورا مهم سند په توگه وگټل شوه .
ډاکټر شاران له بي بي سي سره په خبرو کې د دغې جايزې پر ترلاسه کولو خوښي وښووله خو ويې ويل چې د دۀ څيړنه د دۀ په وينا په سمندر کې د يوۀ څاڅکي برابر ده .
ډاکټر طاهر شاران د افغانستان د باميان په ولايت کې زيږيدلى او په مزار شريف کې يې لومړنۍ زده کړې کړي دي .
دى وايي ليواله دى چې يوه ورځ افغانستان ته ستون شي او هلته د اتمي انرژۍ په برخه کې کار وکړي .
په لويديځ کې گڼ شمير افغان ځوانان په لوړو زده کړو بوخت دي خو ډيرى يې له پېچلو ساينسي مضامينو سره مينه نه ښيي .
No comments:
Post a Comment